我叫念深，通常啲人都會叫我做阿葉。我係一個好普通嘅文員仔，每日返工放工咁過日子，無咩興趣嗜好，放假都係留係屋企做宅男，生活好單調平凡，直至遇上「佢」，為我生活帶來少少變化。
我每日係粉嶺火車站往紅磡方面嘅六號月台等車，我唔係專登揀依個月台等車，而係我第一日返工係六號，就揀左依個月台返，之後就慣左係到等車。但依一刻，我心態已經變左專登係依個月台返工，因為每日早上大約八點左右，「佢」都會出現係依個月台，個女人好吸引我，係月台上面，佢簡直就係一堆女人乘客之中發出獨特嘅光芒，令我雙眼成日都有意無意咁望住佢。
有時我會為我太早到而企係佢前面而嬲自己，有時會為我太遲到而企佢係後面勁遠而嬲自己，有時會為我夾個時間岩岩而企係佢格離而自豪，每一個早上『佢』都為我帶來少少刺激感覺，係我返工嘅精神早餐食糧，唔食嘅話會好唔舒服，食左就會好有精神咁返工。
日復日，起初我都係滿足我視覺同心態上嘅享受，而唔會諗採取進一步行動，但久而久之，我就會諗:『每日返工都企係佢身邊，佢會唔會注意到我嘅存在呢?』我又會諗我成日有意無意咁望佢同企係佢身邊，佢會唔會諗:『個變態佬又黎啦!討厭!』
個腦好多疑問，又會諗佢有冇男朋友，又怕唔怕出街比人問拎電話? 突然之間比左好多問題比自己，之後問左好多朋友意見，但佢地都係想食住花生等睇戲，不負責任地係咁叫我去馬，仲講到好嚴重話:『問佢拎電話啦，唔比咪唔比囉!又唔會死嘅!』，『可能佢一直都等緊你出聲問佢拎電話呢傻仔!』，『衰左咪轉第二個月台返工等車囉!怕咩?』，『你問左可能唔得，但你唔問就永遠唔得!』。
佢地講講下，攪到我真係好想去馬，心底裡唔知點解覺得佢地又幾有道理，加上生活太過Dry，不知不覺間又覺得幾有希望，於是我鼓起勇氣咁決定問佢拎電話。
一日，我膽粗粗咁企係六號月台附近，一見到「佢」出現，我就扮哂野行去佢格離企，正當我拎起手機，打開輸入電話聯絡人嗰一頁，正想開口問佢拎電話時，突然間發現佢隻手指戴住隻介指，即刻令我窒哂機，之後『佢』好順手咁拎部手機出黎玩，剎那間我睇到佢手機套有張情侶合照。
屌，原來有仔，好在無問姐，一時之間，我慶幸自己無問到佢拎電話，但同時，我又為佢有男朋友而感到氣餒同失望，期望愈大失望真係愈大。正當我好灰咁收埋部電話，呆呆望住個天暗嘆:『咩咁玩我呀!』
突然間，我比人拍左一下膊頭，我轉身一望，見到一個怕怕羞羞嘅女仔，佢身旁個女仔朋友就出聲:『佢想識你呀!但佢又唔夠膽，我咪幫佢問你拎電話!』
嗰刻，我係到諗，點解依個世界真係有人會係街到問人拎電話，又諗諗下又正常，因為我頭先咪差啲咁做......後來同個女仔傾談之間，原來佢每一日都有意無意咁企我格離，留意左我好耐，今日搵左佢個朋友陪，就決定開口想問我拎電話。
原來，有時侯我地太專注一個『目標』，可能忽視左身邊嘅人和事，就好似我每一日早上，我個視線同世界只有『佢』，而無留意到身邊都有人一直留意緊自己，一直都係我身邊出現。成日都聽到女人話想要好男人，但佢地永遠都追緊一個公認係壞男人但係佢地眼中係好男人嘅人，而忽視真正嘅好男人其實就係身邊。
就係咁，我就同左依個女仔一齊，因為佢好鐘意我，加上佢又乖乖女，同佢一齊都幾舒服，不過佢就有啲擔心，始終我地都係街到識返黎，佢好無安全感，就問左我一句:『你係咪真係鐘意我架?』
我就好認真咁望住佢講:『當然，唔鐘意你都唔會同你一齊啦? 我保證，一定愛你一生一世。』
之後我地每一日早上都會好滿足咁手拖手企係六號月台，抬頭望向天，感謝上天安排依段緣份比我地。
.......................................................
..................................................
................................................
.............................................
.........................................
............................
.....................
..................
................
..............
...........
.......
......
.....
....
..
一年後
『喂? 係，我早左出門，你唔洗等我啦!唔講啦!有車到!你自己返工啦!拜拜!』說罷，我就收左線，心裡不禁講左句:『好煩。』已經厭了每日都同女友一齊返工，雖然生活上多左個女朋友，為生活帶來少少變化，但好快就覺得無咩癮，慢慢變左平凡單調，雖然佢好好，但我硬係覺得好似差咁啲野咁。
望一望六號月台，自從我拍拖後，『佢』唔知咩事突然間消失左咁，好耐都無見，最後我都慢慢忘記左佢，係有時侯會好無聊咁諗下佢依家係邊。
當我睇下架車幾時黎到時，『佢』企左我格離，我個心突然跳得好快，久違了嘅心動刺激緊張嘅感覺一下子湧現，依種感覺好正，我仲留意到佢隻手無左隻介指，而當佢拎手機出黎時，張情侶合照已經消失左，換句話說，佢好大機會係單身，當我望住佢時侯，佢竟然都望一望我，我地兩個對望嘅時侯，仿佛都互傳緊一個訊息比大家，就係:『好耐無見。』
突然，手機響起，螢幕上顯示出女朋友嘅名，我即刻關上佢廢事比『佢』見到，然後諗左幾秒，吞一吞口水，再打開輸入電話聯絡人嗰一頁，準備做出一年前無做嘅事.......
Search